加入防水設計!Snapchat 攝影眼鏡 Spectacles 2.0

準備迎接夏天,Snap Inc. 唔執輸,趁大家準備添置夏季裝著之時,就推出新一代攝影眼鏡 Spectacles。

第一代 Spectacles 攝影眼鏡於 2016 年底首次推出,一推出就備受好評,但之後銷量開始下滑,更要減價促銷。但 Snapchat 的母公司 Snap Inc. 未有因此而卻步,今日就宣佈推出第二代 Spectacles。第二代 Spectacles 賣 150 美元(約 $1,177 港元),比起舊款貴 20 美元,但規格上有咩分別?最大的升級就係加入防水設計,可以好似宣傳片中的美男美女戴住眼鏡游水⋯ 而且官方指新款 Spectacles 比舊款更輕巧。

用家可以用鏡臂上的快門操控相機,拍攝 1216 x 1216 像素的 10 秒/30 秒的 60 fps 影片,或 1642 x 1642 像素的照片。Snap Inc. 表示新款 Spectacles 的收音效果將會有大改進,全因為新款加入第二個收音咪。拍攝過後,用家以 802.11ac Wi-Fi(2.4 / 5 GHz)傳輸媒體亦會比上一代快 4 倍,內存 4GB 儲存空間,用家可以儲存 150 條影片或 3,000 張相片。而充滿一次電可以拍攝約 70 段影片,無電時,可以將眼鏡放入附帶的眼鏡盒充電,足夠完整充電 4 次。

設計夠型仔,功能又夠創新,事實上係幾吸引嘅,但暫時只於美國、加拿大、英國和法國公開發售,而 5 月 3 日就會開始在比利時、芬蘭、意大利、愛爾蘭、荷蘭、挪威和波蘭開賣,香港朋友就可能要買水貨啦。

Facebook Comments